नवरात्रको पाँचौँ दिन आज स्कन्दमाताको पूजा, यस्तो छ धार्मिक महत्त्व

मेगा खबर संवाददाता

२९, आश्विन २०८३

586

नवरात्रको पाँचौँ दिन आज स्कन्दमाताको पूजा, यस्तो छ धार्मिक महत्त्व

काठमाडौँ, शारदीय नवरात्रको पाँचौँ दिन आज देवी स्कन्दमाताको पूजा–आराधना गरिँदै छ। नवदुर्गाका पाँचौँ स्वरूप स्कन्दमातालाई सन्तान सुख, शान्ति, समृद्धि र मुक्तिकी देवीका रूपमा श्रद्धापूर्वक पूज्ने परम्परा छ ।

कमलको फूलमा विराजमान हुने भएकाले स्कन्दमातालाई पद्मासना देवी पनि भनिन्छ। सेतो वर्ण र सिंह वाहन भएकी यी देवीका चार हात छन् । दुई हातमा कमलको फूल, एक हातमा वरमुद्रा र अर्को हातले काखमा रहेका पुत्र कार्तिकेयलाई सम्हालेको स्वरूपमा उनको वर्णन गरिएको छ ।

पौराणिक कथाअनुसार, तारकासुर नामक राक्षसले तीनै लोकमा आतंक मच्चाएपछि भगवान् शिव र पार्वतीका पुत्र कार्तिकेयले उनको वध गरेका थिए। तारकासुरको अत्याचारबाट देवताहरूलाई मुक्ति दिलाउन कार्तिकेयको जन्म भएको धार्मिक विश्वास छ। स्कन्दमाताको पूजा गर्दा पुत्र कार्तिकेयको समेत आराधना हुने मान्यता छ ।

देवी भागवत पुराणअनुसार स्कन्दमाता सूर्यमण्डलकी अधिष्ठात्री देवी हुन्। उनको भक्तिपूर्वक पूजा गर्दा साधकले अलौकिक तेज र कान्ति प्राप्त गर्ने विश्वास गरिन्छ। साथै, मनोकामना पूरा हुने, मानसिक शान्ति मिल्ने र मोक्ष प्राप्तिको मार्ग सहज हुने धार्मिक मान्यता छ ।

यस दिन भक्तजनले स्नान गरी शुद्ध भएर देवीको प्रतिमा वा कलश स्थापना गर्छन्। पञ्चामृत, फूल, चन्दन, अक्षता, धूप–दीप, नैवेद्य र फलफूल चढाएर पूजा गरिन्छ। देवीको स्तोत्र तथा मन्त्र पाठ गरी आरती गर्ने र प्रसाद वितरण गर्ने परम्परा छ।

स्कन्दमाताको पूजा मन्त्र

सिंहासनगता नित्यं पद्माश्रितकरद्वया।
शुभदास्तु सदा देवी स्कन्दमाता यशस्विनी॥

बिहिवार, आश्विन २९ २०८३०८:१८:०५

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।