सिन्धुपाल्चोक, सिन्धुपाल्चोकमा सञ्चालित १०२ मेगावाट क्षमताको मध्य भोटेकोशी जलविद्युत आयोजनाबाट उत्पादित विद्युतलाई राष्ट्रिय प्रसारण प्रणालीमा थप व्यवस्थित रूपमा जोड्ने काम अघि बढेको छ । यसैक्रममा आयोजनाको विद्युत केन्द्रलाई बाह्रबिसेस्थित ४००२२०१३२ केभी प्रसारण हबमा जोड्ने कार्यको प्राविधिक अवस्था र प्रगति निरीक्षण गरिएको छ ।

नेपाल विद्युत् प्राधिकरणका उपकार्यकारी निर्देशक तथा मध्य भोटेकोशी जलविद्युत कम्पनी लिमिटेडका अध्यक्ष मदन तिम्सिनाको नेतृत्वमा गएको टोलीले सोमबार आयोजनाको स्थलगत निरीक्षण गरेको हो । निरीक्षणका क्रममा कम्पनीका कार्यकारी निर्देशक रामगोपाल शिवाकोटी पनि सहभागी थिए ।

टोलीलाई आयोजना प्रमुख सन्दीप जोशीले आयोजनाको समग्र अवस्था,प्राविधिक पक्ष,विद्युत् उत्पादन क्षमता, प्रसारण प्रणालीसँगको एकीकरण कार्य र आगामी योजनाबारे जानकारी गराएका थिए ।

चिलिमे जलविद्युत कम्पनीको सहायक कम्पनीका रूपमा रहेको मध्य भोटेकोशी जलविद्युत कम्पनीले निर्माण गरेको उक्त आयोजनाले २०८२ असोजदेखि व्यावसायिक विद्युत् उत्पादन गर्दै आएको छ ।

यसैबीच,निरीक्षणका क्रममा कर्मचारीको योगदान र व्यवस्थापनको विषयसमेत उठाइएको छ । समग्र उद्योग ट्रेड युनियन नेपाल, मध्य भोटेकोशी जलविद्युत कम्पनीका अध्यक्ष केशव तामाङले आयोजना निर्माणदेखि सञ्चालनसम्म १३–१४ वर्षदेखि निरन्तर कार्यरत कर्मचारीको अनुभव,दक्षता र योगदानको उचित मूल्याङ्कन गर्न कम्पनी नेतृत्वसँग आग्रह गरेका छन् ।

उनले लामो समयदेखि संस्थामा काम गर्दै आएका कर्मचारीको सेवा अवधि र भूमिकालाई सम्मान गर्दै वृत्ति विकास,सेवासुविधा तथा पेसागत सुरक्षाका विषयमा न्यायोचित व्यवस्था गर्नुपर्नेमा जोड दिएका थिए ।

कम्पनीको संस्थागत विकास र दिगोपनका लागि कर्मचारीको मनोबल उच्च राख्नुका साथै उनीहरूको योगदानको उचित कदर गर्न आवश्यक रहेको तामाङको भनाइ थियो ।

मध्य भोटेकोशी आयोजना सिन्धुपाल्चोकको ऊर्जा विकाससँगै राष्ट्रिय विद्युत् प्रणालीका लागि पनि महत्वपूर्ण मानिन्छ । आयोजनालाई प्रसारण हबसँग जोड्ने कामले उत्पादित विद्युत् प्रवाहलाई थप व्यवस्थित बनाउने अपेक्षा गरिएको छ ।