साढे २१ किलो सुन भन्सारमा बुझाइयो, चिनियाँ नागरिकमाथि अनुसन्धान जारी

मेगा खबर संवाददाता

२६, आश्विन २०८३

565

साढे २१ किलो सुन भन्सारमा बुझाइयो, चिनियाँ नागरिकमाथि अनुसन्धान जारी

काठमाडौं,बूढानीलकण्ठको माथिल्लो भंगालबाट बरामद भएको २१ किलो ७५०.६८ ग्राम सुन प्रहरीले त्रिभुवन अन्तर्राष्ट्रिय विमानस्थल भन्सार कार्यालयमा बुझाएको छ ।

काठमाडौं उपत्यका अपराध अनुसन्धान कार्यालयले सुनसहित पक्राउ परेका तीन चिनियाँ नागरिकलाई पनि थप अनुसन्धान तथा कारबाहीका लागि भन्सार कार्यालय पठाएको हो ।

कार्यालयका एसएसपी सन्तोष खड्काले भन्सारमा बुझाए पनि सुन तस्करीसँग जोडिएको सम्भावित सञ्जालबारे प्रहरीको अनुसन्धान जारी रहेको बताए । उनका अनुसार घटनाको सबै पक्ष र सम्भावित ‘नेक्सस’ खोतल्न छुट्टै अनुसन्धान टोली बनाएर काम भइरहेको छ ।

प्रहरीले असोज २२ गते माथिल्लो भंगालस्थित एक घरबाट सुनका टुक्रा,बिस्कुट आकारका ढिक्का र लेसिलो अवस्थाको सुन बरामद गरेको थियो । बरामद सुनको त्यही दिनको बजार मूल्य ५४ करोड ६० लाख ७ हजार ३२० रुपैयाँ बराबर रहेको प्रहरीले जनाएको छ ।

सुनसहित चीनको जियाङ्सु–ग्वाङडोङका २७ वर्षीय हान फिई, ४७ वर्षीय चोउ लङसिन र ३७ वर्षीय वाङ जियान्जेन पक्राउ परेका छन् ।

प्रहरीका अनुसार उनीहरूले सिंगो घर भाडामा लिएर सुन प्रशोधन गर्ने ‘कारखाना’ सञ्चालन गरेको आरोप छ । बरामद सुन हवाई रुट हुँदै नेपाल भित्रिएको हुनसक्ने प्रहरीको आशंका छ ।

सोमवार, आश्विन २६ २०८३०१:३३:३५

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।