काठमाडौँ, मनसुनी वायुको प्रभाव कायमै रहँदा आज देशभरको मौसम बदली रहने भएको छ । मौसम पूर्वानुमान महाशाखाका अनुसार विभिन्न प्रदेशमा चट्याङसहित वर्षाको सम्भावना छ भने कोशी, बागमती र गण्डकी प्रदेशका केही स्थानमा भारी वर्षा हुन सक्ने देखिएको छ ।

हाल मनसुनको न्यून चापीय रेखा सरदर स्थानभन्दा दक्षिणतर्फ रहेको छ। यसको प्रभावले कोशी प्रदेशसहित देशका पहाडी तथा हिमाली भूभागमा सामान्यतया बादल लागेको छ भने तराई क्षेत्रमा आंशिकदेखि सामान्य बदली रहेको छ। अहिले कोशी, बागमती र लुम्बिनीका थोरै तथा गण्डकी, कर्णाली र सुदूरपश्चिमका एक–दुई स्थानमा हल्कादेखि मध्यम वर्षा भइरहेको छ ।

महाशाखाका अनुसार दिउँसो पनि देशभर सामान्यतया बादल लाग्नेछ। कोशी, बागमती र गण्डकीका हिमाली क्षेत्रमा केही स्थान तथा लुम्बिनी, कर्णाली र सुदूरपश्चिमका हिमाली क्षेत्रमा थोरै स्थानमा चट्याङसहित मध्यम वर्षा हुन सक्नेछ ।

पहाडी भूभागका केही स्थानमा समेत चट्याङसहित मध्यम वर्षाको सम्भावना छ। यस्तै, बागमती, गण्डकी र लुम्बिनीका तराई भूभागका केही स्थान तथा मधेससहित कोशी र सुदूरपश्चिमका तराई क्षेत्रमा थोरै स्थानमा वर्षा हुन सक्ने महाशाखाले जनाएको छ ।

दिउँसो कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा भारी वर्षाको सम्भावना रहेको छ।

राति पनि मौसममा खासै सुधार नहुने देखिएको छ। देशभर सामान्यतया बादल लाग्नेछ। कोशी, बागमती र गण्डकीका हिमाली तथा पहाडी भूभागका केही स्थानमा तथा लुम्बिनी, कर्णाली र सुदूरपश्चिमका थोरै स्थानमा चट्याङसहित मध्यम वर्षा हुन सक्नेछ।

तराईतर्फ कोशी, बागमती, गण्डकी र लुम्बिनीका केही स्थान तथा मधेस र सुदूरपश्चिमका थोरै स्थानमा वर्षाको सम्भावना छ। कोशी प्रदेशका पहाडी तथा तराई भूभागका एक–दुई स्थानमा राति भारी वर्षा हुन सक्ने पूर्वानुमान गरिएको छ ।

भारी वर्षाको सम्भावना रहेका क्षेत्रमा नदी तथा खोलामा पानीको बहाव बढ्न सक्ने र पहाडी क्षेत्रमा पहिरोको जोखिमसमेत रहन सक्ने भएकाले आवश्यक सतर्कता अपनाउन महाशाखाले आग्रह गरेको छ ।