ठूला नदीमा बढ्यो पानीको सतह, तीन नदीले पार गरे सतर्कता तह

मेगा खबर संवाददाता

१७, भाद्र २०८३

337

ठूला नदीमा बढ्यो पानीको सतह, तीन नदीले पार गरे सतर्कता तह

काठमाडौँ, देशका विभिन्न क्षेत्रमा भइरहेको वर्षाको असर ठूला नदीहरूमा देखिन थालेको छ । नदीमा पानीको बहाव बढेसँगै सुनकोशी, बुढीगण्डकी र महाकाली नदीले सतर्कता तह पार गरेका छन् ।

जल तथा मौसम विज्ञान विभाग अन्तर्गतको बाढी पूर्वानुमान महाशाखाका अनुसार आज बिहान ६ बजेको मापनमा यी तीनवटै नदीमा पानीको सतह तोकिएको सतर्कता तहभन्दा माथि पुगेको हो ।

सिन्धुलीको खुर्कोटस्थित सुनकोशी नदीमा पानीको सतह ७ दशमलव ६२ मिटर पुगेको छ। यहाँ ७ दशमलव ५ मिटरलाई सतर्कता तह मानिन्छ। अहिले भने सुनकोशीको बहाव स्थिर रहेको छ ।

यस्तै, गोरखाको आरुघाटस्थित बुढीगण्डकी नदीमा पानीको सतह ३ दशमलव ६ मिटर पुगेको छ। आरुघाटमा ३ दशमलव ५ मिटरलाई सतर्कता तह मानिन्छ। पछिल्लो मापनमा बुढीगण्डकीको पानी भने विस्तारै घट्दो क्रममा रहेको छ ।

उता डडेलधुराको पारीगाउँस्थित महाकाली नदीमा पानीको सतह ६ दशमलव ३७ मिटर पुगेको छ। यहाँको सतर्कता तह ५ दशमलव ८ मिटर हो । महाकालीमा पनि हाल पानीको बहाव स्थिर रहेको महाशाखाले जनाएको छ ।

नदीमा पानीको सतह बढेपछि तल्लो तटीय क्षेत्रमा बाढीको जोखिम बढ्न सक्ने भएकाले महाशाखाले नदी आसपास तथा तल्लो तटीय क्षेत्रमा बसोबास गर्ने सर्वसाधारणलाई विशेष सावधानी अपनाउन आग्रह गरेको छ ।

वर्षा जारी रहेमा नदीको जलसतह थप बढ्न सक्ने भएकाले नदी किनारका बासिन्दालाई अनावश्यक रूपमा नदी तथा खोलानालाको आसपास नजान र सम्भावित जोखिमबाट जोगिन सुरक्षित स्थान पहिचान गरेर तयारी अवस्थामा रहनसमेत आग्रह गरिएको छ ।

बुधवार, भाद्र १७ २०८३०७:०९:२८

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।