बाढीले बगाएको सेफ भेटेपछि तोडफोड गरेर रकम निकालियो, २९ जना नियन्त्रणमा

मेगा खबर संवाददाता

१३, भाद्र २०८३

466

बाढीले बगाएको सेफ भेटेपछि तोडफोड गरेर रकम निकालियो, २९ जना नियन्त्रणमा

काठमाडौँ, रसुवाको भोटेकोशी बाढीले बगाएर धादिङ पुर्‍याएको सेफ तोडफोड गरी त्यसमा रहेको रकम निकालेर लगेको आरोपमा प्रहरीले २९ जनालाई नियन्त्रणमा लिएको छ ।

भदौ १० गते आएको बाढीले बगाएको उक्त सेफ धादिङको गल्छी गाउँपालिका–४ बेल्खुखोलास्थित त्रिशूली नदी किनारमा भेटिएको थियो । सेफभित्र रकम रहेको र स्थानीयले तोडफोड गरी आफूखुसी निकालेर लगेको सूचना भदौ १२ गते पाएपछि जिल्ला प्रहरी कार्यालय धादिङले अनुसन्धान अघि बढाएको हो ।

प्रहरीले प्रारम्भिक अनुसन्धानका क्रममा २९ जनालाई नियन्त्रणमा लिएर खानतलासी गर्दा उनीहरूको साथबाट ९२ लाख ६८ हजार ५ सय ५ रुपैयाँ नगद बरामद गरेको जनाएको छ ।

नियन्त्रणमा लिइएकामध्ये अधिकांश गल्छी गाउँपालिका–४ मासटारका स्थानीय छन् । उनीहरूबाहेक गल्छी–६ आदमघाट, सिद्धलेक–७ आदमटार तथा चितवन र पर्सा घर भई धादिङमा बस्दै आएका व्यक्तिसमेत रहेका छन् ।

प्रहरीका अनुसार बरामद रकमको वास्तविक स्रोत, सेफमा रहेको कुल रकम तथा घटनामा थप व्यक्तिको संलग्नताबारे अनुसन्धान भइरहेको छ ।

प्रहरीले नियन्त्रणमा लिएका २९ जनाको नाम र विवरणसमेत सार्वजनिक गरेको छ । उनीहरू १९ देखि ४९ वर्ष उमेर समूहका छन् ।

बाढीले बगाएर ल्याएको सेफ भेटिएपछि त्यसलाई तोडफोड गरी रकम निकालिएको घटनाले स्थानीयस्तरमा समेत चासो बढाएको छ । प्रहरीले घटनामा संलग्न अन्य व्यक्तिको खोजी तथा बरामद रकमको थप अनुसन्धान जारी राखेको जनाएको छ।

शनिवार, भाद्र १३ २०८३०२:१५:०७

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।