चीन–नेपाल सीमामा बनेको तालको जोखिम घट्यो, पानीको सतह निरन्तर घट्दै

मेगा खबर संवाददाता

१३, भाद्र २०८३

520

चीन–नेपाल सीमामा बनेको तालको जोखिम घट्यो, पानीको सतह निरन्तर घट्दै

काठमाडौँ चीन–नेपाल सीमा नजिकै हिमपहिरोपछि बनेको ताल फुटेर थप विपद् निम्तिन सक्ने जोखिम घटेको चिनियाँ अधिकारीहरूले बताएका छन् । तालको आकार निरन्तर खुम्चिँदै गएपछि जोखिम कम भएको उनीहरूको भनाइ छ ।

चीन–नेपाल सीमामा दुई नदीको संगमस्थलमा बनेको उक्त तालबाट पानी विस्तारै बाहिर बगिरहेको छ । भूउपग्रह तस्बिरले पनि जलाशयको क्षेत्रफल घट्दै गएको देखाएको चिनियाँ सञ्चारमाध्यमले जनाएका छन् ।

चिनियाँ जलस्रोत मन्त्रालयका अनुसार बिहीबार बिहान तालको सतहको क्षेत्रफल करिब ९९ हजार वर्गमिटरमा झरेको थियो । अघिल्लो मापनको तुलनामा यो करिब २१ हजार वर्गमिटर कम हो ।

हिमनदीको लेदो र भग्नावशेष थुप्रिएर बनेको उक्त ताल फुट्दा तल्लो तटीय क्षेत्रमा अर्को ठूलो विपद् आउन सक्ने भन्दै यसअघि विज्ञहरूले चेतावनी दिएका थिए । सम्भावित जोखिमका कारण उद्धार तथा राहत कार्यमा समेत असर पर्न सक्ने बताइएको थियो ।

तालको अवस्थाबारे थप जानकारी संकलन गर्न चिनियाँ सरकारी टोलीले ड्रोन, पोर्टेबल भूउपग्रह स्टेसन र मोबाइल सर्भिलेन्स क्यामेरासहित १५ जनाको टोली परिचालन गरेको छ ।

शुक्रबार तालबाट पानी बाहिर बगेपछि केही समय उद्धार कार्य रोकिएको थियो । तर थप मूल्याङ्कनपछि तत्कालका लागि जोखिम नियन्त्रणमा रहेको निष्कर्ष निकालिएको चिनियाँ अधिकारीहरूले जनाएका छन् ।

शनिवार, भाद्र १३ २०८३०१:५०:३५

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।