निजी होस्टेललाई मापदण्ड सुधार्न एक महिनाको अल्टिमेटम

मेगा खबर संवाददाता

७, भाद्र २०८३

352

निजी होस्टेललाई मापदण्ड सुधार्न एक महिनाको अल्टिमेटम

काठमाडौं जिल्ला प्रशासन कार्यालयले उपत्यकामा निजीस्तरमा सञ्चालित छात्रावास अर्थात् होस्टेललाई मापदण्ड सुधार्न एक महिनाको अल्टिमेटम दिएको छ ।

होस्टेलमा विद्यार्थीमाथि दुर्व्यवहार तथा यातना, तोकिएकोभन्दा बढी शुल्क असुली, कमजोर पूर्वाधार, सरसफाइ तथा खाना–पानीको गुणस्तरमा लापरबाहीजस्ता गुनासो बढेपछि प्रशासनले सुधारका लागि समयसीमा तोकेको हो ।

प्रशासनका अनुसार अनुगमनका क्रममा केही होस्टेललाई तीन लाख रुपैयाँसम्म जरिवाना गर्नुका साथै शिलबन्दीसमेत गरिएको छ ।

प्रशासनले जारी गरेको २१ बुँदे सूचनामा होस्टेल अनिवार्य रूपमा सम्बन्धित निकायमा दर्ता तथा नवीकरण गर्नुपर्ने, शुल्क तथा दररेट पारदर्शी रूपमा सार्वजनिक गर्नुपर्ने र सञ्चालक तथा विद्यार्थीको अद्यावधिक विवरण नजिकको प्रहरी कार्यालयमा बुझाउनुपर्ने उल्लेख छ ।

त्यस्तै, होस्टेलभित्र लागुऔषध, मादक पदार्थ, चुरोट तथा सुर्तीजन्य पदार्थको प्रयोग र बिक्री–वितरणमा पूर्ण प्रतिबन्ध लगाउन निर्देशन दिइएको छ । संवेदनशील स्थानबाहेक अन्य क्षेत्रमा सीसीटीभी जडान गरी आन्तरिक सुरक्षा व्यवस्था मजबुत बनाउन पनि भनिएको छ ।

महिला र पुरुष दुवैका लागि सञ्चालन हुने होस्टेलमा छुट्टाछुट्टै आवास तथा आवश्यक सुरक्षा, शौचालय, बाथरुम र सुत्ने कोठाको व्यवस्था गर्नुपर्ने प्रशासनले जनाएको छ ।

अध्ययन तथा मनोरञ्जनका लागि पर्याप्त कक्ष, पुस्तकालयलगायतका आधारभूत सुविधा उपलब्ध गराउनसमेत प्रशासनले होस्टेल सञ्चालकलाई निर्देशन दिएको छ ।

null

आइतवार, भाद्र ७ २०८३०३:५८:०६

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।