Mega Khabar

काठमाडौँ, लगातारको वर्षाका कारण देशका विभिन्न स्थानमा सडक अवरुद्ध भएका छन् भने केही सडकखण्डमा रातिको समयमा सवारीसाधन सञ्चालनमा रोक लगाइएको छ । प्रहरी प्रधानकार्यालयका अनुसार काभ्रे, सिन्धुपाल्चोक, रसुवा, रुकुम पश्चिम, लमजुङ, इलाम, नुवाकोट, रोल्पा, पाल्पा र मकवानपुरका सडक प्रभावित भएका छन् ।

काभ्रेको खुर्कोट–नेपालथोक–कटुन्जेबेँसी सडकमा बाढीको जोखिमका कारण साँझ ६ बजेदेखि बिहान ४ बजेसम्म सबै सवारीसाधन सञ्चालनमा रोक लगाइएको छ। मकवानपुरको कान्ति लोकपथमा पनि साँझ ५ बजेदेखि बिहान ५ बजेसम्म सवारी सञ्चालन बन्द गरिएको छ ।

नुवाकोटको टोखा–छहरे सडकखण्डमा अत्यावश्यक सेवाबाहेकका सवारीसाधनलाई राति १० बजेदेखि बिहान ५ बजेसम्म आवागमनमा रोक लगाइएको छ ।

यसैगरी, इलामको मेची राजमार्ग, सिन्धुपाल्चोकको अरनिको राजमार्ग, रसुवाको त्रिशूली–मैलुङ–स्याफ्रुबेँसी र पासाङल्हामु सडक, रुकुम पश्चिमको भेरी करिडोर, लमजुङको बेँसीसहर–मनाङ सडक, रोल्पाको घोराही–थवाङ–रुकुम सहिदमार्ग तथा पाल्पाको सिद्धार्थ राजमार्ग पहिरो र कटानका कारण अवरुद्ध भएका छन् ।

प्रहरीले सडकमा बाढी, पहिरो तथा भूक्षयको जोखिम कायम रहेकाले यात्रा गर्दा सावधानी अपनाउन र सम्भव भएसम्म वैकल्पिक मार्ग प्रयोग गर्न आग्रह गरेको छ ।