नदीमा पानीको बहाव बढ्ने, साना खोलामा आकस्मिक बाढीको जोखिम

मेगा खबर संवाददाता

२९, श्रावण २०८३

205

नदीमा पानीको बहाव बढ्ने, साना खोलामा आकस्मिक बाढीको जोखिम

काठमाडौं, देशभरका प्रमुख नदीमा पानीको बहाव अहिले सतर्कता तहभन्दा तल रहे पनि आगामी तीन दिनमा नदीको सतह बढ्ने पूर्वानुमान गरिएको छ ।

बाढी पूर्वानुमान महाशाखाले शुक्रबार बिहान ८ बजे जारी गरेको बुलेटिनअनुसार कोशी, नारायणी, बागमती, कर्णाली र महाकाली नदीमा हाल बाढीको अवस्था सामान्य छ । यी नदीका सहायक नदीसँगै कन्काई, कमला, बबई, पूर्वी राप्ती तथा पश्चिम राप्तीमा पनि पानीको बहाव सतर्कता तहभन्दा तल छ ।

महाशाखाका अनुसार आज विशेषगरी नारायणी, कर्णाली र महाकाली बेसिनका नदीमा पानीको बहाव बढ्नेछ। नारायणी, त्रिशूली, बूढीगण्डकी, मर्स्याङ्दी, सेती र कालीगण्डकीमा पानीको सतह उल्लेख्य बढ्ने अनुमान गरिएको छ। कर्णाली, भेरी, पश्चिम सेती र महाकाली नदीमा पनि बहाव बढ्नेछ ।

कोशी बेसिनका सप्तकोशी, तमोर, अरुण, सुनकोशी र दूधकोशीमा भने आज पानीको सतह सामान्य रूपमा बढ्ने महाशाखाले जनाएको छ। भोलि र पर्सि देशभरका प्रमुख नदीमा पानीको बहाव थप उल्लेख्य रूपमा बढ्ने पूर्वानुमान छ ।

ठूला नदीको तुलनामा आज साना नदी तथा खोलामा बाढीको जोखिम बढी रहेको महाशाखाले जनाएको छ । काठमाडौं उपत्यकाका काठमाडौं, भक्तपुर र ललितपुरसहित दोलखा, सिन्धुपाल्चोक, काभ्रेपलाञ्चोक र चितवनका खहरे खोलामा आकस्मिक बाढी आउन सक्ने चेतावनी दिइएको छ ।

यस्तै ताप्लेजुङदेखि कञ्चनपुरसम्मका पहाडी तथा तराईका विभिन्न जिल्लामा साना नदीको बहाव उल्लेख्य बढ्ने र आकस्मिक बाढीको मध्यम जोखिम रहेको महाशाखाले जनाएको छ ।

साना नदी तथा खोलामा बाढीको जोखिम आगामी दुई दिनसम्म कायम रहनेछ । विशेषगरी गण्डकी, लुम्बिनी र सुदूरपश्चिम प्रदेशका केही साना नदीमा भोलि र पर्सि बहाव आकस्मिक रूपमा बढ्न सक्ने भएकाले नदी तटीय क्षेत्र तथा खहरे खोला आसपासका बासिन्दालाई सतर्क रहन महाशाखाले आग्रह गरेको छ ।

772685810_122229810326355476_5709921352829989837_n

शुक्रवार, श्रावण २९ २०८३११:२९:५०

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।