काठमाडौं, सरकारले नेपाली सेनासहित निजामती कर्मचारी,नेपाल प्रहरी र शिक्षकहरूको संशोधित तलबमान सार्वजनिक गरेको छ। मन्त्रिपरिषद्को निर्णय अनुसार अर्थ मन्त्रालयले साउन १ गतेदेखि लागू हुने गरी नेपाली सेनाका सबै दर्जाका सैनिकको तलब र सुविधा परिमार्जन गरेको हो ।

नयाँ तलब संरचना अनुसार प्रधान सेनापतिको मासिक तलब ९० हजार ५९४ रुपैयाँ कायम गरिएको छ । यसअघि ८४ हजार ९३२ रुपैयाँ रहेको आधार तलबमा दुई ग्रेड थप भएपछि उक्त रकम कायम भएको हो । त्यस्तै,रथीको तलब ८७ हजार ८५ रुपैयाँ, उपरथीको ८४ हजार ५७६ रुपैयाँ तथा सहायक रथीको ७८ हजार २२० रुपैयाँ पुगेको छ ।

अधिकारी तहमा महासेनानीले ७२ हजार ८७६ रुपैयाँ, प्रमुख सेनानीले ६९ हजार ९ रुपैयाँ, सेनानीले ६७ हजार ९०७ रुपैयाँ, सह–सेनानीले ६२ हजार ३१५ रुपैयाँ,उप–सेनानीले ५९ हजार ५३७ रुपैयाँ र सहायक सेनानीले ४८ हजार ५८ रुपैयाँ मासिक तलब पाउनेछन् ।

जुनियर कमिसन्ड अफिसर (जेसीओ) समूह अन्तर्गत प्रमुख सुवेदारको तलब ४९ हजार ६०७ रुपैयाँ, सुवेदारको ४७ हजार ११४ रुपैयाँ र जमदारको ४३ हजार ३७२ रुपैयाँ निर्धारण गरिएको छ । हुद्दा,अमलदार र प्यूठको मासिक तलब क्रमशः ३७ हजार ६४८ रुपैयाँ,३७ हजार ४५७ रुपैयाँ र ३७ हजार ११३ रुपैयाँ कायम गरिएको छ ।

आधारभूत तहका सिपाहीले अब मासिक ३६ हजार ३३८ रुपैयाँ तलब पाउनेछन् भने रिक्रुटको तलब २७ हजार १७२ रुपैयाँ तोकिएको छ । विभिन्न श्रेणीका फलोअर्सको तलब भने जिम्मेवारी र दर्जाअनुसार करिब २८ हजारदेखि ४० हजार रुपैयाँसम्म निर्धारण गरिएको छ ।

विमान सम्भार समूहका प्राविधिक सैनिकहरूको तलब पनि सोही अनुपातमा वृद्धि गरिएको छ । यस समूहमा पाइलट उपरथीको मासिक तलब ९० हजार ५०९ रुपैयाँ पुगेको छ ।

सरकारले संशोधित तलबमानसँगै ग्रेड रकम तथा वृद्धिपश्चात् कायम हुने तलबको १० प्रतिशत मासिक प्रोत्साहन भत्ता उपलब्ध गराउने निर्णयसमेत गरेको छ ।