काठमाडौँ, लगातारको वर्षापछि आएको बाढी र पहिरोका कारण देशका विभिन्न मुख्य राजमार्गहरू प्रभावित भएका छन् । साउन ४ गते बिहान ६:१० बजेसम्मको विवरण अनुसार कोशी र बागमती प्रदेशका धेरै सडक खण्डमा यातायात अवरुद्ध भएको छ भने केही स्थानमा एकतर्फी सञ्चालन भइरहेको छ ।

कोशी प्रदेश अन्तर्गत भोजपुर नगरपालिका–५ बोखिममा बाढीका कारण मध्यपहाडी लोकमार्ग एकतर्फी सञ्चालनमा छ । इलामको राजदुवालीस्थित मेची राजमार्ग, खोटाङको दिक्तेल–रुपाकोट–मझुवागढी–६ माम्खास्थित मध्यपहाडी लोकमार्ग तथा उदयपुरको कटारी–११ हर्देनीस्थित सिद्धिचरण लोकमार्ग पहिरोका कारण पूर्ण रूपमा अवरुद्ध भएका छन् ।

बागमती प्रदेशमा पनि बाढी र पहिरोले सडक सञ्जालमा व्यापक असर परेको छ । काभ्रेपलाञ्चोकको रोशी गाउँपालिका–९ पिन्थलीमा पहिरो खस्दा बि.पी. राजमार्ग पूर्ण रूपमा बन्द भएको छ। सम्भावित बाढीको जोखिमका कारण खुर्कोट–नेपालथोक–कटुन्जेबेँसी सडक खण्डमा सवारीसाधन सञ्चालन रोकिएको छ ।

यस्तै, मकवानपुरको हेटौँडा–थिङ्गन–बागमती–ललितपुर जोड्ने कान्तिलोकपथमा पनि बाढी र पहिरोको जोखिमका कारण अर्को सूचना नभएसम्म सवारी सञ्चालन स्थगित गरिएको छ ।

सिन्धुपाल्चोकको भोटेकोशी गाउँपालिका–४ जिरोकिलो र वडा नं. २ कोदारीमा पहिरो जाँदा अरनिको राजमार्ग पूर्ण रूपमा ठप्प भएको छ। चितवनको इच्छाकामना गाउँपालिका–३ फिस्लिङमा पहिरो खस्दा पृथ्वी राजमार्ग पनि पूर्ण रूपमा अवरुद्ध बनेको छ ।

धादिङको बेनीघाट रोराङ गाउँपालिका–१० तिमराङखानीमा पहिरो पन्छाएर पृथ्वी राजमार्ग एकतर्फी सञ्चालनमा ल्याइए पनि जोवाङ खोलामा पुनः पहिरो खसेपछि सडक पूर्ण रूपमा बन्द भएको छ । रसुवाको गोसाइँकुण्ड गाउँपालिका–६ बोकेझुन्डामा पहिरो गए पनि पासाङ ल्हामु राजमार्ग एकतर्फी रूपमा सञ्चालनमा रहेको छ ।

सम्बन्धित निकायले अवरुद्ध सडकहरू खुलाउने कार्य तीव्र रूपमा अघि बढाइरहेको जनाएको छ । अत्यावश्यकबाहेकको यात्रा नगर्न तथा यात्रा गर्नुअघि सडकको अवस्थाबारे जानकारी लिएर मात्र यात्रा गर्न सम्बन्धित निकायले आग्रह गरेका छन् ।