काठमाडौं । सिन्धुपाल्चोक जिल्लाको बाह्रविसे नगरपालिका–८ र ९ स्थित मानेस्वारा र राम्चे गाउँको सिमाना पर्ने ‘अधेँरि खोला झरना’को चर्चा बढ्न थालेको छ । जिल्लास्थित बाह्रविसे बजारबाट करिब २ घन्टाको पैदल मार्गमा पुग्न सकिने उक्त झरनाका तस्बिरहरुले सामाजिक सञ्जालमा स्थान पाउन थालेको छ । 

केही समयअघिबाट सामाजिक सञ्जाल टिकटक लगायतमा ‘बाहुबली झरना’ नाम गर्दै काभ्रेको रोशी गाउँपालिकाको एक मनमोहक झरनाले चर्चा कमायो । अहिले राजधानी लगायत विभिन्न ठाउँका आन्तरिक पर्यटकहरुको ‘रिफ्रेसमेन्ट होलि डे’ मनाउने उपयुक्त गन्तव्य बन्न थालेको छ । अहिले उक्त झरनाजस्तै देखिने बाह्रविसेको यो झरनालाई पनि धेरैले मनमोहक झरनाको रुपमा लिएका छन् । 

घुमाउरो सिढीको गोरेटो बाटो हुँदै करिब २ घन्टाको पैदलयात्रामा पुग्न सकिने यो ठाउँमा जाँदा बाटोमा मनोरम सिन्धुपाल्चोक लगायतका जिल्लाहरुको दृश्यावलोकन गर्न सकिन्छ । स्थानियका अनुसार गाडि वा मोटरसाईलबाट त्यहाँ जाँदा कम्तिमा ३० मिनेटसम्मको पैदल हिँड्नपर्छ भने सवारी साधनमार्फत नै झरनामा पुग्न सकिन्छ । 

पैदल यात्रामा हुँदा भोटेकोशि बगिरहेको दृश्यावलोकन निकै राम्रो देखिने स्थानियहरुको भनाई छ । यसलाई प्रचार–प्रसार गर्दै राजधानीबाट नजिकमा रहेको सिन्धुपाल्चोकको आन्तरिक तथा पर्यटकीय क्षेत्रको विकासमा सघाउ पुग्ने स्थानियको विश्वास छ ।राजधानीबाट बाह्रविसेसम्म पुग्न मोटरसाइकल वा बसमा राजधानीबाट करिब ४ देखि ५ घन्टाको यात्रामा पुग्न सकिन्छ ।  साथै, त्यहाँ पुग्नुअघि बाटोमा दोलालघाट, सुकुटे, भोटेकोशी, बन्जी जम्प लगायतका चर्चित क्षेत्रहरु बाटोमै पर्छ । 

यसलाई संरक्षण र संर्वद्धन गर्न सके बाह्रविसे क्षेत्रको मात्रै नभएर सिंगो सिन्धुपाल्चोक जिल्लाको परिचय बन्न सक्ने भन्दै सामाजिक संजालमा विभिन्न प्रचार बढ्न थालेको छ ।

तस्बिर सौजन्य : युधिर पौडेल