रन्जित आचार्य

काठमाडौं । सिन्धुपाल्चोकको जुगल गाउँपालिका–३ गुम्बा बोल्दे, तान्किम्राङ बगरमा संचालित यम्बालिङ  र अपर बलेफि हाइड्रोपावरले खनेको सडक स्थानियहरुले बन्द गरेका छन् । उक्त सडक खन्ने क्रममा ‘ब्लास्टिङ’ गर्दा २ सय भन्दा बढी घरधुरी पहिरोको उच्च जोखिमा रहेको भन्दै स्थानियहरुले विरोध गरेका हुन् । 

बोल्देका स्थानियबासीहरुले हाइड्रोपावरसँग कुनै सम्झौता नभएसम्म वर्षातको कारण अवरुद्ध भएको सडक सफा नगर्न स्थानियहरुले अनुरोध गरेका छन् । १९ भदौदेखि बाटो बन्द हुनेगरी स्थानियहरुले निर्णय गरेका थिए । ७.२७ मेगावाटको उक्त हाइड्रोपावरमा सडक खन्दा भएको क्षतिका कारण लगभग २५० घरधुरी भएको गाउँनै पहिरोको उच्च जोखिममा परेको स्थानियले जानकारी दिए । 

गाउँपालिका उपाध्यक्ष सिर्जना तामाङ भने हाइड्रोपावर बन्नुभन्दा अगाडी त्यहाँका स्थानियलाई त्यसले निम्त्याउन सक्ने क्षतिबारे जानकारी दिनपर्ने तर्क गर्छिन् । वावरणीय संरक्षणको विषयलाई विर्सन नहुने भन्दै त्यसको जनतासामु अध्ययन गरेर स्पष्ट हुनपर्ने बताइन् । 

हाइड्रोपावर र स्थानिय सरकारबीच केही नहुने भन्दै सरकारसँगै सम्झौता गरेर आएर संचालन भएको भन्दै समन्वय अहिलेसम्म नभएको उनले बताइन् । स्थानिय जनप्रतिनिधिसमेत रहेकी तामाङले क्षति हुने अवस्थाको बारेमा सम्पूर्ण विषयको पूर्वसूचना नदिँदा समस्या भएको बताइन् । 

हाइड्रोपावरको प्रयोजनको लागि खनेको सडकका कारण पहिरो जान थालेको स्थानिय जित बहादुर तामाङ (जितेन पाख्रिन) ले जानकारी दिए । हाइड्रोपावरको काम बन्द गर्नुपर्ने र स्थानियहरुको घर जग्गा जोखिममा पार्न नहुने भन्दै उनीहरु आन्दोलित छन् ।

यसअघि पनि सिन्धुपाल्चोकका विभिन्न क्षेत्रमा विकास निर्माणका कामको कारण पर्न गएको असरका कारण बस्ती नै विस्थापित भएका छन् । विशेषगरि, जुगल र बलेफी गाउँपालिकाका बस्तीहरु हाइड्रो र नदी दोहनका कारण जोखिममा परेको स्थानियहरु बताउँछन् ।