काठमाडौं । सभामुख अग्निप्रसाद सापकोटा बुधबार बिहान सिन्धुपाल्चोकका बाढी पहिरो प्रभावितहरुलाई भेट्न पुगे । भुगर्वविद, विपद जोखिम न्युनिकरण तथा व्यवस्थापन प्राधिकरणका प्रमुख कार्यकारी सहित सिन्धुपाल्चोक पुगेका सापकोटाले अहिलेलाई अस्थायी रुपमा खड्किएको समस्याको समाधान हुनेगरी राहत बाडे । 

यो वर्ष परेका विभिन्न बाढी तथा पहिरोका विपद्मा पनि युवा नेतृत्वको सहभागिता उत्साहित छ । बुधबार राहत सामाग्री सहित जिल्ला पुगेका सभामुख यसअघि पनि घटना घट्नेवित्तिकै आफ्नो निर्वाचन क्षेत्रका सबैको अभिभावक बनेर पुगेका थिए । बुधबार उनले दिर्घकालिन समस्या समाधानको उपायहरुको खोजी गर्नेगरी भुगर्वविद लगायतको टोलीसहित जिल्ला पुगेका हुन् । 

सापकोटा निर्वाचित भएर आएको १ नंबर क्षेत्र प्रत्येक वर्ष विभिन्न प्राकृतिक प्रकोपबाट थलिँदै आएको छ । यो वर्षपनि सिन्धुपाल्चोकको बाह्रविसे नगरपालिका, भोटेकोशी गाउँपालिका र जुगल गाउँपालिकाका विभिन्न क्षेत्रहरु बाढी तथा पहिरोको विपद्मा फसे । युवा नेतृत्वको प्रयास र जोडबलले प्रायजसो आपत–विपद् पर्नेबित्तिकै यहाँका स्थानियले राहत महसुस गर्न पाएका छन् । 

बुधबार सभामुख सहितको टोलीले सुरुमा बाह्रविसे नगरपालिकाको जम्बु, खागदल र भोटेकोशी गाउँपालिकाको लार्चाका बाढी पीडितलाई राहत हस्तान्तरण गरेका थिए । बाह्रबिसे र भोटेकोशीका लागि बन्देउमा सामग्री हस्तान्तरण भएको सभामुख सापकोटाका प्रेस विज्ञ श्रीधर न्यौपानेले जानकारी दिए । 

त्यसपछि जुगल गाउँपालिकाको लिदी–२ को बासखर्क पुगेर राहत वितरण भएको उनले बताए । लिदिबाट  विस्थापित भएर सोहि पालिका १ मा रहेको बाँसखर्कमा बसेका स्थानियहरुलाई सभामुख सापकोटाले बुधाबार पुनः आफूहरु जनताकै साथमा रहेको अनुभव गराएका छन् । 

लिदिमा गएको पहिरोमा पनि हालसम्म ३३ जनाको मृत्यु भएको छ भने ६ जना अझै बेपत्ता छन् । पहिराले बस्ती नै विस्थापित भएपछि १७२ घरधुरी लिदिबासीलाइ बासखर्क स्थानान्तरण गरिएको छ ।