चौतारा । बागमती प्रदेश सरकारले अहिले संचालनमा भइरहेका भन्दा बाहेक थप ६५० शैयाको आइसोलेसन संचालनमा ल्याउने भएको छ । पछिल्ला केहीदिनयता बढ्दै गएको कोरोना भाइरस संक्रमणको जोखिमललाई मध्यनजर गर्दै प्रदेशका विभिन्न जिल्लामा आइसोलेसन संचालनमा ल्याउन लागिएको हो । 

बागमती प्रदेशका सामाजिक विकास मन्त्री युवराज दुलाल ‘शरद’ का अनुसार सिन्धुपाल्चोक, दोलखा, रामेछाप र सिन्धुलीमा २५ शैयाको आइसोलेसन थप गरिने भएको हो । त्यस्तै, धादिङ, नुवाकोट र रसुवाको सदरमुकाममा ५० शैया, भक्तपुर र मकवानपुरमा २०० शैयाको आइसोलेसन संचालनमा ल्याउन लागिएको उनले बताए । 

सिन्धुपाल्चोकमा कार्यरत गैरसरकारी संस्था सामुदायिक विकास तथा वातावरण संरक्षण मञ्च ९सिडिइसिएफ० का चार जना कर्मचारीमा कोरोना संक्रमण पुष्टि भएपछि चौताराका विभिन्न तीन स्थान सिल भएको छ । संक्रमित मध्येका २ जना अलपत्र अवस्थामा रहेको सामाजिक सञ्जाल तथा संचार माध्यममा चर्चा भएपछि मन्त्री दुलालको पहलमा आइसोलेसनमा पुर्याइएको छ । 

सिन्धुपाल्चोकबाटै निर्वाचित भएका मन्त्री दुलालले जिल्लामा संक्रमित राख्ने ठाउँ नभएपछि आइसोलेसन वार्ड थप्ने विशेष पहल गरेका हुन् । त्यस्तै, सिन्धुली, धादिङ र नुवाकोटमा ४ शैया, हेटौंडा र भक्तपुरमा १० शैयाको आइसीयु संचालनमा ल्याइने भएको छ । 

सो संस्थाको कार्यालय रहेको चौतारा साँगाचोकगढी नगरपालिका– ५ किसानटोलको घर, संस्थाका कर्मचारी खाजा, खाना खाने स्थानीय बाबुकाजी श्रेष्ठ र नारायण श्रेष्ठको होटललाई समेत सिल गरिएको छ । 

कोरोना संक्रमण पुष्टि भएपछि सिडिईसिएफका १ महिला र १ पुरुषलाई मेलम्चीको बाहुनेपाटीस्थित आइसोलेशन र १ महिला र १ पुरुषलाई चौतारा अस्पतालको आइसोलेशनमा राखिने भएको छ ।

कोरोना संक्रमित भएकाहरु चितवनमा एक तालिममा सहभागी भई साउन २८ सिन्धुपाल्चोक आइपुगेका थिए ।