भोटेकोशी बाढीको भयावह तस्वीर : ७३४ शव फेला, २ हजार ४९८ अझै बेपत्ता

मेगा खबर संवाददाता

१४, भाद्र २०८३

379

भोटेकोशी बाढीको भयावह तस्वीर : ७३४ शव फेला, २ हजार ४९८ अझै बेपत्ता

काठमाडौँ, रसुवाको भोटेकोशी क्षेत्रमा आएको विनाशकारी बाढीको असर तल्लो तटीय जिल्लासम्म फैलिएको छ । बाढीमा परी हालसम्म ७३४ जनाको शव फेला परेको प्राधिकरणको रिपोर्टमा उल्लेख छ ।

बाढीको तीव्र बहावसँगै शवहरू विभिन्न तल्लो तटीय जिल्लासम्म पुगेका छन् । सबैभन्दा धेरै चितवनमा २५९ जनाको शव फेला परेको छ ।

यस्तै, नवलपरासी पूर्वमा १८४, नवलपरासी पश्चिममा ८२, गोरखामा ५८, नुवाकोटमा ५२, धादिङमा ५०, तनहुँमा ३६ र रसुवामा १३ जनाको शव फेला परेको छ ।

२ हजार ४९८ जना अझै सम्पर्कविहीन

बाढी र त्यसपछिको विपद्मा परी अझै २ हजार ४९८ जना सम्पर्कविहीन रहेको प्राधिकरणले जनाएको छ ।

सम्पर्कविहीन हुनेमा विभिन्न सुरक्षा निकायका ८५ जना छन् । जसमा नेपाली सेनाका ४५,नेपाल प्रहरीका २७ र सशस्त्र प्रहरीका १३ जना रहेका छन् ।

यस्तै, विभिन्न जलविद्युत् आयोजनामा कार्यरत ९३३ जना कामदार समेत सम्पर्कविहीन छन् ।

सम्पर्कविहीन हुनेमा ५८९ जना विदेशी नागरिक र उनीहरूसँगै रहेका १२७ जना नेपाली पर्यटन सहयोगी पनि छन् ।

स्थानीय प्रशासनका अनुसार रसुवाबाट ५६२ र नुवाकोटबाट ११५ जना बेपत्ता भएका छन् ।

उद्धारमा झण्डै २० हजार सुरक्षाकर्मी परिचालित

विपद्पछि खोज तथा उद्धारका लागि देशभर १९ हजार ८९५ सुरक्षाकर्मी परिचालन गरिएको छ ।

उद्धार अभियानका क्रममा हालसम्म ८ हजार १८६ जनाको जीवितै उद्धार गरिएको प्राधिकरणले जनाएको छ ।

भोटेकोशी र त्यससँग जोडिएका नदीमा आएको बाढीले ठूलो मानवीय क्षति पुर्‍याएपछि सुरक्षा निकायले बेपत्ताको खोजी र उद्धार कार्यलाई निरन्तरता दिइरहेको छ ।

आइतवार, भाद्र १४ २०८३११:०९:५९

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।