बाढी प्रभावितको उद्धार जारी, उपत्यकाका यि १३ अस्पतालमा घाइतेको उपचार

मेगा खबर संवाददाता

१३, भाद्र २०८३

418

बाढी प्रभावितको उद्धार जारी, उपत्यकाका यि १३ अस्पतालमा घाइतेको उपचार

काठमाडौँ, भोटेकोशी नदीमा आएको विनाशकारी बाढीपछि रसुवा, नुवाकोट र धादिङमा उद्धार कार्य जारी छ । बाढी प्रभावित क्षेत्रबाट उद्धार गरिएका घाइतेलाई सरकारले हेलिकप्टरमार्फत काठमाडौं ल्याएर विभिन्न अस्पतालमा उपचार गराइरहेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार उपत्यकाका १३ वटा अस्पतालमा बाढी प्रभावितको उपचार भइरहेको छ । नेपाल मेडिकल कलेज, वीरेन्द्र सैनिक अस्पताल, त्रिवि शिक्षण अस्पताल, मनमोहन मेमोरियल अस्पताल, राष्ट्रिय ट्रमा सेन्टर, ग्रिनसिटी, वीर, नर्भिक, मनमैजु शुभम्, ग्राण्डी, हेम्स, प्रसूति गृह र एपीएफ अस्पतालमा उपचार भइरहेको हो ।

यसैबीच, रसुवास्थित त्रिशूली–३ ‘ए’ जलविद्युत् आयोजनाको सुरुङमा फसेकाहरूको उद्धारका लागि उत्खनन कार्य तीव्र पारिएको छ । प्रधानमन्त्री तथा मन्त्रिपरिषद्को कार्यालयका अनुसार सुरुङको मुखतर्फ २० फिटभन्दा बढी भाग खनिसकिएको छ ।

उत्खननको प्रगति अपेक्षाकृत राम्रो रहेकाले शनिबार दिउँसो २ बजेसम्म सुरुङको मुखसम्म पुग्ने अनुमान गरिएको छ । सुरुङमा फसेकाहरूको उद्धारका लागि नेपाली सेना, सशस्त्र प्रहरी र नेपाल प्रहरीको टोली निरन्तर खटिएको छ ।

बाढीबाट प्रभावित अन्य जलविद्युत् आयोजना तथा संरचनामा पनि खोज तथा उद्धारको काम भइरहेको छ । यसैबीच, सुरुङ उद्धारमा प्राविधिक सहयोगका लागि चीनबाट सुरुङसम्बन्धी विज्ञका दुई टोली नेपाल आउने तयारीमा छन् ।

शनिवार, भाद्र १३ २०८३०२:३५:५६

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।