प्रेस काउन्सिलको बोर्ड सदस्यमा रबिराज बराल, पत्रकारिताको फरक भूमिकामा नयाँ यात्रा

युर्बसि पाैड्याल

४, भाद्र २०८३

1.2K

प्रेस काउन्सिलको बोर्ड सदस्यमा रबिराज बराल, पत्रकारिताको फरक भूमिकामा नयाँ यात्रा

काठमाडौं, पत्रकारिता क्षेत्रमा लामो समयदेखि सक्रिय रबिराज बराल प्रेस काउन्सिल नेपालको बोर्ड सदस्यका रूपमा नयाँ जिम्मेवारी सम्हाल्ने भएका छन् ।

विभिन्न सञ्चारमाध्यममा काम गर्नुका साथै आफूले स्थापना गरेको मिडिया कुराकानीमार्फत पत्रकारिताका सकारात्मक पक्षको प्रशंसा र आवश्यक ठाउँमा आलोचना गर्दै आएका बरालले अब पत्रकारितालाई फरक भूमिकाबाट अघि बढाउने बताएका छन् ।

बरालले नैतिक,जिम्मेवार र मर्यादित पत्रकारिता तथा प्रेस स्वतन्त्रताको पक्षमा काम गर्ने प्रतिबद्धता व्यक्त गरेका छन् । नयाँ जिम्मेवारीका लागि शुभकामना दिने सबैप्रति आभार व्यक्त गर्दै उनले आफूलाई विश्वास गर्नेहरूलाई निराश नपार्ने गरी काम गर्ने बताएका छन् ।

प्रेस काउन्सिलका अध्यक्ष उमेश श्रेष्ठ नेतृत्वको टिमसँग सहकार्य गर्दै आम मिडिया उपभोक्ताका गुनासा,सुझाव तथा आलोचनात्मक प्रतिक्रियालाई सम्बोधन गर्नु आफ्नो प्राथमिकतामध्ये एक रहेको बरालको भनाइ छ ।

“नैतिक तथा जिम्मेवार पत्रकारिता र प्रेस स्वतन्त्रताको पक्षमा कार्य गर्न म सक्दो प्रयास गर्नेछु । शुभकामना दिनुहुने सबैलाई धन्यवाद । तपाईंहरूलाई निराश नपार्न म सक्दो प्रयास गर्नेछु,” बरालले भनेका छन् ।

पत्रकारिताको आलोचक र समर्थक दुवै भूमिकाबाट अघि बढेका बरालका लागि प्रेस काउन्सिलको नयाँ जिम्मेवारी भने पत्रकारिता, सञ्चारमाध्यम र आम मिडिया उपभोक्ताबीचको सम्बन्धलाई अझ प्रभावकारी बनाउने अवसरका रूपमा हेरिएको छ ।

बिहिवार, भाद्र ४ २०८३०४:५७:३१