बस दुर्घटनापछि मध्यपहाडी राजमार्ग अवरुद्ध, पीडितको दोषीमाथि कडा कारबाहीको माग

मेगा खबर संवाददाता

१९, श्रावण २०८३

1.5K

बस दुर्घटनापछि मध्यपहाडी राजमार्ग अवरुद्ध, पीडितको दोषीमाथि कडा कारबाहीको माग

सिन्धुलीको फिक्कल गाउँपालिका–२ नवलपुरमा भएको बस दुर्घटनापछि कार सुनकोसी नदीमा खस्दा चालकसहित तीन जना बेपत्ता भएको घटनालाई लिएर पीडित परिवार र स्थानीयले मध्यपहाडी राजमार्ग अवरुद्ध गरेका छन् ।

मंगलबार बिहानदेखि खुर्कोट–घुर्मी सडकखण्डमा रुख, ढुंगा तथा टायर बालेर सडक अवरुद्ध गरिएको हो । प्रदर्शनकारीले दुर्घटनामा संलग्न बस चालकलाई कडा कारबाही, बेपत्ताहरूको खोज तथा उद्धारमा तीव्रता, पीडित परिवारलाई उचित क्षतिपूर्ति र बसधनी तथा यातायात समितिलाई वार्तामा उपस्थित गराउन माग गरेका छन् ।

सोमबार दिउँसो काठमाडौंबाट ओखलढुंगातर्फ जाँदै गरेको बागमती प्रदेश ०८–००१ ख ०१४४ नम्बरको यात्रुबाहक बसले विपरीत दिशाबाट आउँदै गरेको प्रदेश ३–०१–०२४ च ९५७३ नम्बरको कारलाई ठक्कर दिएको थियो । ठक्करपछि कार सुनकोसी नदीमा खस्दा चालकसहित तीन जना बेपत्ता भएका हुन् ।

बेपत्ता हुनेमा सिन्धुपाल्चोकका ३९ वर्षीय दिलकुमार लामा, गोलन्जोर गाउँपालिका–१ का २८ वर्षीय गणेश थापा र तिनपाटन गाउँपालिका–९ का १७ वर्षीय सुजन बलम्पाकी मगर रहेका छन् । दिलकुमार लामा मध्यपहाडी लोकमार्ग निर्माण आयोजनाका ठेकेदार तथा जुगल गाउँपालिका–७ का पूर्व वडाध्यक्षसमेत हुन् ।

जिल्ला प्रहरी कार्यालय सिन्धुलीका अनुसार नदीमा पानीको बहाव उच्च रहे पनि नेपाली सेना, नेपाल प्रहरी, सशस्त्र प्रहरीको गोताखोर टोली, स्थानीयवासी र आफन्तहरूको सहभागितामा खोज तथा उद्धार कार्य मंगलबार बिहानदेखि पुनः तीव्र पारिएको छ । यद्यपि समाचार तयार पार्दासम्म बेपत्ताहरूको अवस्था खुल्न सकेको छैन ।

प्रहरीले दुर्घटनामा संलग्न बसका चालक २६ वर्षीय हेमबहादुर तामाङलाई नियन्त्रणमा लिएर घटनाबारे अनुसन्धान अघि बढाएको जनाएको छ ।

मंगलवार, श्रावण १९ २०८३१२:३८:२९

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।