Mega Khabar

काठमाडौं, नाबालिकाको डिम्ब कारोबार गरेको आरोपमा प्रहरीले एक महिलालाई पक्राउ गरी मानव बेचबिखनको कसुरमा अनुसन्धान अघि बढाएको छ ।

जिल्ला प्रहरी परिसर ललितपुरले लमजुङकी राधिका गोतामेलाई साउन १ गते पक्राउ गरेको हो। उनी ललितपुरको इमाडोलमा ब्युटिसियनका रूपमा काम गर्दै आएकी थिइन् ।

प्रहरीका अनुसार गोतामेले १७ वर्षीया किशोरीलाई आर्थिक प्रलोभनमा पारेर ग्वार्कोस्थित बीएन्डबी अस्पतालको आईभीएफ केन्द्रमा डिम्ब झिक्न लगाएको आरोप छ । उनले डिम्ब झिकेबापत ३० हजार रुपैयाँ पाएको बयान दिएको जिल्ला प्रहरी परिसर ललितपुरका एसपी गौतम मिश्रले जानकारी दिए ।

डिम्ब झिकिएपछि किशोरीको स्वास्थ्यमा समस्या देखिएपछि घटना प्रहरीसम्म पुगेको थियो । एसपी मिश्रका अनुसार किशोरीले चिनेकै एक साथीमार्फत राधिकासँग भेट भएको र उनैले अस्पताल लगेर डिम्ब झिक्न लगाएको बयान दिएकी छन् ।

प्रहरीले घटनामा संलग्न चिकित्सकसहित अन्य व्यक्तिको पनि खोजी गरिरहेको जनाएको छ । यस प्रकरणमा मानव बेचबिखन सम्बन्धी कसुर अन्तर्गत अनुसन्धान जारी छ ।

यसअघि पनि नाबालिकाको डिम्ब तस्करीसम्बन्धी अर्को प्रकरणमा अनुसन्धान भए पनि महान्यायाधिवक्ता कार्यालयले मुद्दा नचलाउने निर्णय गरेपछि उक्त विषय विवादमा परेको थियो ।