शरीरलाई स्वस्थ राख्नका लागि खानपिनका कुरामा विशेष ध्यान दिन आवश्यक छ । स्वस्थ खानेकुरा खाने बेला केही कुरा याद पनि गर्नुपर्छ नभए यसले शरीरलाई फाइदाको साटो हानी पुर्याउन सक्छ । 

स्याउको दानाः

स्याउको दानामा केही मात्रामा साइनाइड हुन्छ, जसले शरीरलाई क्षती पुर्याउँछ । यसले सास फेर्न समस्या निम्त्याउँछ । तर गल्तीपूर्वक यसको दाना निलेको खण्डमा आत्तिहाल्नुपर्ने स्थिती भने हुँदैन । स्याउको दानामा एक सुरक्षात्मक कोटिङ हुन्छ जसले साइनाइडलाई शरीरको तन्त्रमा प्रवेश गर्नबाट रोक्छ । स्याउ खानेबेला सावधान हुनुहोस् र यसको दाना हटाएर मात्रै खानुहोस् ।

चेरीको दानाः

चेरीले मुटुरोगलाई कम गर्नुका साथै पाचन क्रियालाई सही राख्छ तर यसको दाना हानिकारक हुन्छ । चेरीको दाना असाध्यै कडा हुन्छ र यसमा प्रुसिक एसिड हुन्छ जुन निकै विषालु मानिन्छ  । यदि तपाईंले गल्तीपूर्वक चेरीको दाना निल्नुभएको छ भने डराउनु पर्र्दैन, यो कुनै न कुनै तरिकाले बाहिर आउँछ । चेरी खाँदा यसको दाना चपाउने कोसिस नगर्नुहोस् ।

हरियो आलूः

हरियो वा अंकुरित आलूमा गलाइकोसाइड नामको विषाक्त पदार्थ हुन्छ । हरियो आलू खानु सुरक्षित मानिँदैन । ग्लाइकोसाइडयुक्त हरियो आलू खाँदा रिँगटा लाग्ने र टाउको दुख्ने समस्या हुनसक्छ ।

जाइफलः

जाइफलको थोरै मात्राले खानाको स्वाद बढाउने काम गर्छ तर यसको एक चम्चाको सेवनले मात्रै पनि यसले हानी गर्छ । जायफलमा मिरिस्टिसिन नामको रसायन उच्च मात्रामा पाइन्छ जसका कारण यसको बढी मात्राले रिँगटा लाग्ने, मतिभ्रम हुने र हृदयघातको समेत समस्या निम्तिन सक्छ ।

काँचो काजूः

साधारणतया पसलमा पाइने काजू काँचो हुँदैन । बजारमा आउनुअघि काजूलाई उमालेर उरुशिओल नामको विषालू पदार्थ निकालिनेछ गरिन्छ । नउसिनेको काजू खाँदा एलर्जीको समस्या हुनसक्छ ।

च्याउः

च्याउ स्वादिलो हुन्छ र यसले शरीरलाई निकै फाइदा पुर्याउँछ तर च्याउ खाँदा यसको पहिचान भने गर्न सक्नुपर्छ । जंगली च्याउ खाँदा पेट दुख्ने, बान्ता आउला जस्तो हुने, डिहाइड्रेसन र फोक्सोमा समस्या हुनसक्छ ।

काँचो आँपः

काँचो आप, यसका बोक्रा र पातमा पनि विषाक्त पदार्थ पाइन्छ । यदि तपाईंलाई एलर्जीको समस्या छ भने काँचो आँप खाँदा तपाईंको छालामा बिमिरा देखिने र शरीर सुन्निने समस्या पनि हुनसक्छ ।