काठमाडाैँ, मंसिर १६

बागमती प्रदेशमा सवारी चालक अनुमति पत्रको लागि ट्रायलमा ७० अंक ल्याए पास हुने व्यवस्था लागू हुने भएको छ ।

प्रदेशको प्रदेश श्रम,रोजगार तथा यातायात मन्त्रालयका सूचना अधिकृत देवराज चौलागाईंले उक्त विषयबारे पुष्टि गरे । सूचना अधिकृत चौलागाईंका अनुसार यहि मंसिर १८ गते (आइतबार) देखि लाइसेन्सको लागि दिइने प्रयोगात्मक परीक्षामा ७० अंक ल्याए चालकले लाइसेन्स पाउने छन् ।

लिखितमा ६० प्रतिशत ल्याउनुपर्ने हुन्छ । पुरानो व्यवस्था अनुसार लिखितमा ५० अंक ल्याए पास हुने थियो । बागमती प्रदेशले आफ्नो सबै यातायात कार्यालयमा परिपत्र गरेको अधिकृत चौलागाईंले जनाएको छ । अब आइतबारदेखि 'सवारी चालक अनुमति पत्र परीक्षा सञ्चालन निर्देशिका २०७७' अनुसार लाइसेन्सको लिखित तथा ट्रायल परीक्षा  हुनेछ ।

यातायात व्यवस्था विभागले ट्रायलमा ७० अंक ल्याए उत्तीर्ण हुने व्यवस्था ल्याएको लामो समय भइसकेको छ । विभागले २०७८ जेठदेखि नै निर्देशिकामा भएको व्यवस्था कार्यान्वयन गर्ने बताएको थियो ।

सन्दर्भमा बागमती प्रदेशले गत असोजदेखि नै लाइसेन्स परीक्षामा नयाँ मापदण्ड लागू गर्ने बताएको थियो । 

नयाँ प्रणालीमा के व्यवस्था छ ?

निर्देशिकामा वर्ग 'क' (ए) मोटरसाइकल,स्कुटर,मोपेड र वर्ग 'ख' (बी) कार,जिप,डेलिभरी भ्यानको लाइसेन्स लिने सहज व्यवस्था गरिएको छ ।

निर्देशिकाको दफा ५ (२) बमोजिम वर्ग (कट), (एके) र वर्ग 'ख' (बी)का लागि लिइने लिखित परीक्षाका लागि ५००५०० वटा प्रश्नको दुइटा प्रश्न संग्रह विभागले सार्वजनिक गरेको छ ।

यो व्यवस्था अनुसार लिखित परीक्षामा सवारी तथा यातायात व्यवस्था सम्बन्धी कानुनी प्रावधान,ट्राफिक नियम पालना तथा सवारी साधनको प्राविधिक पक्ष सम्बन्धी सामान्य व्यावहारिक ज्ञानका विषय समेटी १०० पूर्णांकको प्रश्न सोधिनेछ । यसमा चारचार अंकका २५ वटा वस्तुगत उत्तर दिने प्रश्न हुन्छन् ।

लिखित परीक्षाको अवधि ३० मिनेटको हुनेछ । सम्बन्धित कार्यालयले विद्युतीय माध्यमबाट लिखित परीक्षा सञ्चालन गर्न सक्ने व्यवस्था रहेको छ । निर्देशिकामा भएको व्यवस्था अनुसार परीक्षार्थीले ट्रायलमा ७० अंक ल्याए लाइसेन्स प्राप्त गर्न सक्छन् ।

विभागले यसअघि परीक्षार्थीले आफ्नै सवारी समेत प्रयोग गर्न सक्ने व्यवस्था गरेको थियो । यो व्यवस्था कार्यान्वयनमा नआउँदै संशोधन गरिएको छ । अब कार्यालयले तोकेका तथा उपलब्ध गराएका सवारी मात्र प्रयोग गर्न सकिन्छ ।

प्रयोगात्मक परीक्षा १०० पूर्णांकको हुनेछ । 

१,घुमाउरो आठ- २० अंक

२,साँघुरो फलेक- १० अंक

३,युटर्न- १० अंक

४,ट्राफिक संकेत- १५ अंक

५, बम्प्स (उबडखाबड)- १५ अंक

६,उकालो- २० अंक

७,परीक्षार्थीको व्यवहारगत पक्षको समग्र मूल्यांकन- १० अंक

यस्ता छन् ट्रायलमा अंक काटिने अवस्थाहरूः

१ घुमाउरो आठमा एक पटकसम्म अंकित रेखा छोएमा ५ अंक घट्ने छ ।

२ एकपटकसम्ममा खुट्टाले भुइँ टेकेमा थप ५ अंक घट्ने छ ।

३ युटर्नमा टर्निङ इन्डिकेटर लाइट नबाले १० अंक घट्ने छ ।

४ ट्राफिक संकेत पालना नगर्दा १५ अंक घट्ने छ ।

५ उबडखाबडमा एक पटकसम्म भुइँमा टेकेमा ५ अंक घट्ने छ ।

६ एकपटक सवारीको स्टार्ट बन्द भए ५ अंक घट्ने छ ।

६ सवारी चलाउनु अगाडि सवारीको ब्रेक, टायर र ऐनाहरूको सामान्य निरीक्षण गर्नुपर्नेछ। यसो नगरे ३ अंक घट्नेछ ।

८ हेलमेटको लक नलगाई सवारी चलाएमा ४ अंक घट्नेछ ।

९ असंयमित भएर सवारी चलाए ३ अंक घट्नेछ ।

फेल हुने अवस्थाहरूः

१ एकपटक भन्दा बढी भुइँमा टेके अर्थात् स्टार्ट बन्द भएमा हुने ।

२ एकपटक भन्दा बढी अंकित रेखा छोएमा वा खुट्टा भुइँमा टेकेमा हुने ।

३ ठीक दिशाबाट ठीक तरिकाले ८ नबनाएमा हुने ।

४ सवारीको स्टार्ट बन्द भएमा हुने ।

५, साँघुरो फलेकमा खुट्टाले भुइँ टेक्दा अर्थात् फलेकको लम्बाई पार गर्नु अगाडि नै सवारी फलेक बाहिर निस्किएमा हुने ।

उकालोमा तोकिएको रेखा नाघी सवारी रोकेमा वा नरोकी अगाडि बढेमा वा रोकिएको अवस्थाबाट सवारीको पछाडिको टायर ६ इन्चभन्दा पछाडि सरेमा हुने ।

उकालो सकेर ओरालो झर्ने क्रममा तोकिएको रेखा नाघी सवारी रोकेमा वा सवारी नरोकी अगाडि बढे फेल भइनेछ ।