गलत खाने बानी, विलासी जीवनशैली, जंकफुडको अत्यधिक उपभोग, तनाव आदिका कारण ठूलो संख्यामा मानिस मोटोपनाबाट ग्रसित छन् । मोटोपना नराम्रो मात्र नभई यसले अन्य धेरै रोगहरु पनि ल्याउँछ । मोटोपनका कारण उच्च रक्तचाप, मधुमेह, कोलेस्ट्रोल र मुटुसम्बन्धी रोगको जोखिम निकै बढ्छ । मानिसहरु घण्टौँ जिममा बिताउँछन् र तौल घटाउन डाइटिङको सहारा लिने गर्छन् । कहिलेकाहीँ यस्ता कुराले पनि तौल घटाउन मद्दत गर्दैन ।

आजको व्यस्त जीवनशैलीमा हामी आफ्नो स्वास्थ्यप्रति लापरवाह भएका छौँ । आजको समयमा हरेक दोस्रो व्यक्ति मोटोपनाबाट त्रसित छन् । स्वास्थ्य विज्ञहरुका अनुसार तौल घटाउनका लागि स्वस्थ खाना निकै जरुरी हुन्छ । स्वस्थ रहनको लागि खानासँगै फलफूलको सेवन गर्नु पनि अति आवश्यक हुन्छ । ताजा फलफूलमा भिटामिन, पोषक तत्व, फाइबर आदि पाइन्छ, जुन स्वस्थ रहन आवश्यक हुन्छ । स्वास्थ्य विज्ञका अनुसार फलफूल खाने सबैभन्दा उपयुक्त समय बिहान हो ।

बिहानको खाजामा फलफूल खाँदा ऊर्जा मिल्छ र तौल घटाउन पनि मद्दत गर्छ । यदि तपाईँ पनि आफ्नो बढ्दो तौलबाट हैरान हुनुहुन्छ भने तपाईँले आफ्नो आहारमा केही विशेष फलफूल समावेश गर्न सक्नुहुन्छ ।

१,स्याउ

दैनिक एउटा स्याउ खाएमा रोगबाट बच्न त सकिन्छ नै यसले तौल नियन्त्रणमा पनि मद्दत गर्छ । वास्तवमा स्याउमा भिटामिन, मिनरल्स र फाइबर प्रशस्त मात्रामा पाइन्छ । यस्तै, यसमा क्यालोरीको मात्रा धेरै कम छ । बिहानको खाजामा स्याउ खाँदा मस्तिष्क सक्रिय हुन्छ र तौल घटाउन पनि मद्दत गर्छ । यसबाहेक स्याउ खाँदा मधुमेह, उच्च रक्तचाप र मुटुसम्बन्धी रोगको जोखिम पनि कम हुन्छ ।

२,स्ट्रबेरी

स्ट्रबेरी एक कम क्यालोरी फल हो । यसमा चिनी र सोडियम पनि निकै कम हुन्छ । साथै, यसमा प्रशस्त मात्रामा फाइबर हुन्छ । तौल घटाउनको लागि स्ट्रबेरीको सेवन अवश्य गर्नुपर्छ । हरेक दिन बिहानको खाजामा स्ट्रबेरी खाँदा भोक कम लाग्छ र गलियो खाने चाहना पनि हट्छ ।

३,सुन्तला

सुन्तलाले खानामा स्वादिलो ​​मात्र नभई तौल घटाउन पनि मद्दत गर्छ । सुन्तलामा भिटामिन सी र फाइबर प्रचुर मात्रामा पाइन्छ । यसका साथै यसमा प्रोटिन, फाइबर, पोटासियम, क्याल्सियम र फस्फोरस जस्ता पोषक तत्वहरू पनि पाइन्छ, जुन स्वास्थ्यका लागि निकै महत्त्वपूर्ण हुन्छ । सुन्तला खाँदा शरीरको रोग प्रतिरोधात्मक क्षमता बढ्छ र तौल घटाउन पनि मद्दत गर्छ ।

४,केरा

तौल बढाउन केरा खानु पर्छ भन्ने कुरा तपाईले प्रायः सुन्नु भएको होला । तर, के तपाईलाई थाहा छ, केरा खाँदा तौल घटाउन पनि सकिन्छ? केरामा प्रशस्त मात्रामा फाइबर र एन्टिअक्सिडेन्ट पाइन्छ, जुन तौल घटाउनका लागि फाइदाजनक हुन्छ । केरामा पाइने फाइबरले पेटलाई लामो समयसम्म भरिपूर्ण राख्छ र भोक कम गर्छ । बिहानको खाजामा केरा खाँदा भोक शान्त हुन्छ र दिनभरको काममा पनि ऊर्जा मिल्छ ।

५,मेवा

मेवा हाम्रो स्वास्थ्य र छालाका लागि निकै फाइदाजनक हुन्छ । मेवा खाँदा पाचन प्रणालीलाई स्वस्थ राख्छ र तौल घटाउन मद्दत गर्छ । यसमा भिटामिन ए, भिटामिन सी र फाइबर प्रशस्त मात्रामा पाइन्छ । यसले आन्द्रा सफा गर्छ र कलेजोलाई डिटक्सिफिकेसन पनि गर्छ । यसमा पाइने फाइबरले पेट भरिएको महसुस गराउँछ र तौल घटाउन मद्दत गर्छ । यसका साथै मेवा खाँदा छालाको दाग पनि कम हुन्छ । तौल घटाउन चाहनुहुन्छ भने बिहानको नास्तामा मेवा अवश्य खानुहोस् ।