हजुरआमा हत्याका अभियुक्त प्रहरीलाई धकेलेर फरार

मेगा खबर संवाददाता

२५, आषाढ २०७७

2.5K

हजुरआमा हत्याका अभियुक्त प्रहरीलाई धकेलेर फरार

कैलाली- कैलालीमा हजुरआमाको हत्या अभियोगमा पक्राउ परेका एक युवक ड्युटीमा रहेका प्रहरीलाई नै धकेलेर फरार भएका छन्। इलाका प्रहरी कार्यालय, फल्टुडेको थुनामा रहेका चुरे गाउँपालिका–६ का गणेशबहादुर ऐर बुधबार राति थुनुवा कक्षबाट नै फरार भएका हुन्।

जिल्ला प्रहरी कार्यालय, कैलालीका प्रमुख एवं प्रहरी उपरीक्षक अनुपमशम्शेर जबराले राति ९ बजेको समयमा खाना खाएर हात धुने बेला प्रहरीलाई नै धकेलेर ऐर फरार भएको जानकारी दिए।

“खाना खाने बेला हत्कडी खोलेको मौका छोपेर ड्युटीमा रहेको प्रहरीलाई धकेलेर फरार भएछन्,” जबराले भने, “फरार भएलगत्तै भीरबाट हाम फालेकोले पक्राउ गर्न सकिएन।”

बुधबार रातिबाट जिल्ला प्रहरी कार्यालयका प्रहरी नायब उपरीक्षक प्रतीक विष्टको नेतृत्वमा खटिएको प्रहरी टोलीले खोजबिन जारी राखे पनि ऐर फेला पर्न नसकेको जबराले बताए।

ऐरले ७५ वर्षीय अजुरआमा पार्वतीदेवीलाई २३ गते हत्या गरेका थिए। गत बुधबार नै पक्राउ परेका ऐरलाई एकरात फल्टुडेमा राखेर मुद्दा चलाउन बिहीबार नै धनगढी ल्याउने तयारी प्रहरीको थियो।

ऐरले २३ गते दिउँसो घरमा कोही नभएको मौका छोपी पार्वतीदेवीलाई फलामको रडले घाँटीमा प्रहार गरी घाइते बनाएर घर नजिकैको अरहरको झारीमा लगेर हत्या गरेको प्रहरीले जनाएको छ।

बिहिवार, आषाढ २५ २०७७०५:०३:०८

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।