इङ्लिस प्रिमियर लिग फुटबलको उपाधि दौडमा रहेको आर्सनल लिभरपुलसँग बराबरी

मेगा खबर संवाददाता

२७, चैत्र २०७९

946

काठमाडाैँ, चैत्र २७

इङ्लिस प्रिमियर लिग फुटबलको उपाधि दौडमा रहेको आर्सनल लिभरपुलसँग बराबरीमा रोकिएको छ । आइतबार राति भएको खेलमा आर्सनल लिभरपुलसँग उसैको मैदानमा २–२ गोलको बराबरीमा रोकिएको हो ।

प्रतिस्पर्धात्मक खेलमा आर्सनलले अग्रता जोगाउन नसक्दा अङ्क बाँड्न बाध्य भयो । आर्सनलका लागि गाब्रियल मार्टिनेली र गाब्रियल जेससले गोल गर्नुभयो । लिभरपुलका मोहम्मद सलाह र रोबर्टो फिर्मिन्होले बराबरी गोल फर्काउनुभयो ।

आठौँ मिनेटमा मार्टिनेलीले गोल गर्दै पाहुना टोली आर्सनलको उत्साह जगाउनुभएको थियो । त्यसपछि २८औँ मिनेटमा जेससले गोल गर्दै आर्सनलको अग्रता दोब्बर बनाउनुभयो ।

आर्सनलको लगातार दुई गोलपछि जोसिएको लिभरपुल ४२औँ मिनेटमा सलाहको गोलमा खेलमा फर्किएको थियो । त्यसपछि सलाह मिनेटमा पेनाल्टीमा चुक्नुभएको थियो । ८७ औँ मिनेटमा फिर्मिन्होले गोल गर्दै लिभरपुललाई हारबाट जोगाउनुभयो ।

बराबरीसँगै शीर्षस्थानमा रहेको आर्सनलको ३० खेलबाट ७३ अङ्क छ । आर्सनल दोस्रो स्थानमा रहेको म्यानचेस्टर सिटीभन्दा ६ अङ्कले अगाडि छ । एक खेल कम खेलेको सिटीको ६७ अङ्क छ । ४४ अङ्क बनाएको लिभरपुल आठौँ स्थानमा छ । आइतबार राति नै भएको अर्को खेलमा क्रिस्टल प्यालेसले लिड्स युनाइटेडलाई ५–१ गोलले हराएको छ ।

सोमवार, चैत्र २७ २०७९०४:५५:४३

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।