वैशाखमै चुनाव गर्न राष्ट्रपतिको देउवालाई ‘दबाब’

मेगा खबर संवाददाता

१३, माघ २०७८

2.2K

वैशाखमै चुनाव गर्न राष्ट्रपतिको देउवालाई ‘दबाब’

प्रधानमन्त्री देउवालाई राष्ट्रपति विद्यादेवी भण्डारीले शीलतनिवासमा बोलाएर संविधानले भनेकै समयमा स्थानीय तहको निर्वाचन गर्न सुझाव दिएकी छिन् ।

देउवाले भने राष्ट्रपतिको सुझावलाई सरकारमाथि शीतलनिवासको ‘दबाव’ का रुपमा लिए । राष्ट्रपतिसँगको भेटपछि केही मन्त्रीसँग कुराकानी गर्दै देउवाले भने,राष्ट्रपतिज्यूले बोलाएर वैशाखमै निर्वाचन गर्नुपर्यो भन्नुभयो,मैले यो सरकारले निर्णय गर्ने विषय हो ।

राष्ट्रपतिले प्रधानमन्त्रीलाई वैशाखमै चुनाव गर्नुपर्छ भन्नुभएको हो ? राष्ट्रपतिका विज्ञ सल्लाहकार टीका ढकालले भने,कुनै तिथि मितिको कुरा गर्नु भएको होइन,संविधान र कानूनमा जे व्यवस्था छ,अगाडि बढ्नुपर्छ भन्नुभएको हो । सारांशमा त्यही बुझ्दा हुन्छ ।

देउवाले चुनावबारे सबैसँग सर-सल्लाह भइरहेको राष्ट्रपतिलाई बताएको ढकालले बताए । उनले भने,प्रधानमन्त्रीज्यूले साथीहरुसँग सल्लाह गरेर निर्णय लिन्छु भन्नुभएको छ । निर्वाचन आयोगले वैशाखमै चुनाव गर्न सरकार समक्ष प्रस्ताव गरेको छ । सत्ता गठबन्धनले भने स्थानीय चुनावलाई आगामी हिउँदमा सार्ने तयारी गरिरहेको छ ।

शीतलनिवासको भेटपछि प्रधानमन्त्रीलाई भेटेका एक मन्त्रीले भने,कार्यकाल सकिएपछि मात्रै चुनाव हुने संविधानमा स्पष्ट व्यवस्था हुँदाहुँदै राष्ट्रपतिले प्रधानमन्त्रीलाई बोलाएर वैशाखमै चुनाव गर भन्नु शीतलनिवासको हस्तक्षेप हो भन्ने हाम्रो बुझाइ छ ।

निर्वाचन आयोग र विपक्षी दल नेकपा एमालेले समेत वैशाखमै स्थानीय चुनाव हुनुपर्ने बताइरहेका बेला विहीबार राष्ट्रपतिले प्रधानमन्त्रीलाई बोलाएर संविधान र कानून सम्झाएकी हुन् ।

बिहिवार, माघ १३ २०७८०८:११:००

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।