त्रिविको ट्रान्सक्रिप्ट लिनै मुस्किल, महिनौँसम्म धाउनुपर्ने बाध्यता

मेगा खबर संवाददाता

१४, आश्विन २०८३

595

त्रिविको ट्रान्सक्रिप्ट लिनै मुस्किल, महिनौँसम्म धाउनुपर्ने बाध्यता

काठमाडौँ, त्रिभुवन विश्वविद्यालयबाट उत्तीर्ण विद्यार्थीले ट्रान्सक्रिप्ट लिन अझै पनि ठूलो झन्झट बेहोर्नुपरेको गुनासो गरेका छन् । अनलाइनबाट आवेदन र राजस्व भुक्तानी गरे पनि प्रमाणपत्र लिन परीक्षा नियन्त्रण कार्यालयमै पटक–पटक धाउनुपर्ने अवस्था रहेको उनीहरूको भनाइ छ ।

नाम, रजिस्ट्रेसन नम्बर वा अभिभावकको विवरणमा त्रुटि हुँदा समस्या झन् जटिल बन्ने गरेको छ । प्राविधिक समस्या र पुरानो कागजी प्रक्रियाका कारण कतिपय विद्यार्थीले महिनौँसम्म ट्रान्सक्रिप्ट पाउन नसकेको बताएका छन् ।

जनप्रशासनमा स्नातकोत्तर गरेका दीपक ऐरले प्रक्रिया पूरा गरी राजस्व बुझाएको नौ महिना बितिसक्दा पनि ट्रान्सक्रिप्ट नपाएको बताए । कार्यालय पुग्दा कहिले सफ्टवेयरको समस्या त कहिले प्राविधिक अभाव देखाउँदै फर्काउने गरिएको उनको गुनासो छ ।

त्रिवि परीक्षा नियन्त्रण कार्यालयले भने, आवश्यक कागजात र प्रक्रिया पूरा भए सामान्यतः ७ देखि १० दिनमै ट्रान्सक्रिप्ट उपलब्ध गराउन सकिने जनाएको छ । मौका परीक्षा तथा क्याम्पस तहमा भएका पुराना विवरणका कारण केही विद्यार्थीको प्रमाणपत्र रोकिएको कार्यालयको भनाइ छ ।

ट्रान्सक्रिप्टको समस्या समाधान माग गर्दै हालसम्म करिब तीन सय विद्यार्थीका निवेदन परेको र नियमसँग जोडिएका विषयमा प्राज्ञिक परिषद्बाट निर्णय आवश्यक पर्ने त्रिविले जनाएको छ ।

बुधवार, आश्विन १४ २०८३०७:००:०४

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।